Хамăр пурăнакан вырăна хăтлăх кĕртесси аслисемпе пĕрлех çамрăксен тивĕçĕ те пулмалла. Çак ĕçе пурин те хастар хутшăнмалла. Çакна тĕпе хурса Çĕрпелти вăтам шкулта  вĕренекенсемпе учительсем ака уйăхĕн 24-мĕшĕнче субботника хутшăнчĕç. Вĕсем шкул умĕнче ÿсекен йывăçсен айĕсене тата шкул умне тасатрĕç, Тăван çĕр-шывăн Аслă вăрçинче пуç хунисене асăнса лартнă обелиск таврашĕнче тирпей-илем  кĕртрĕç, шкул пахчине тирпейлерĕç.   Кирлĕ мар ăпăр-тапăра пуçтарчĕç, çÿп-çапа шăлса тасатрĕç, картасене юсарĕç.

Çĕрпел ял поселени ĕçченĕсемпе шкул коллективĕ пĕр-пĕринпе кар тăрса ĕçлерĕç. Чи тĕлĕнмелли - пурте пĕр шухăшлă пулни. Пысăк йышпа темле ĕç те тума пулать. Ку хутĕнче те çапла пулчĕ. Субботник хыççăн таравлăх хитреленсе пыни куç кĕретех.

Анчах та теприсем хăйсем хыççăн çÿп-çап пăрахса хăварни чуна ыраттарать. Урамра темĕн те пĕр выртни килĕшÿсĕр. Çавăнпа та хамăр пурăнакан вырăна тирпейлĕ тытасчĕ, варалас марччĕ. Тасалăхшăн, тирпейлĕхшĕн пурин те тăрăшасчĕ. Тирпей-илем вăл хамăршăнах. Тирпейлӗхе ачаранах хӑнӑхса ӳсмелле.